Össur hvetur Kínverja til að sleppa Liu Xiaobo

Össur Skarphéðinsson utanríkisráðherra hvetur kínversk stjórnvöld til að sleppa Liu Xiaobo, handhafa friðarverðlauna Nóbels í ár, úr haldi. Segir ráðherra engan eiga að sitja í fangelsi fyrir skoðanir sínar.

Í tilkynningu sem birt er á vef utanríkisráðuneytisins segir Össur að Nóbelsverðlaunanefndin norska hafi tekið ákvörðun sína að vel ígrunduðu máli. Liu Xiaobo sé verðugur handhafi Nóbelsverðlauna og að þau séu mikilvæg viðurkenning á framlagi hans og baráttu fyrir mannréttindamálum í Kína.

Þá segir að ráðherra leggi áherslu á að íslensk stjörnvöld eigi hreinskiptin samskipti við Kína eins og önnur ríki. Íslenskir stjórnmálamenn hafi margoft tekið upp mál sem tengist mannréttindum í samtölum sínum við kínverska ráðamenn.