Hjálpar þúsundum heimila

Alþingi samþykkti í gær heimilispakkann svokallaða, fimm lagafrumvörp sem miða að því að aðstoða fjárhagslega verst stöddu heimilin í landinu.

Félagsmálaráðherra telur lögin koma til með að styðja við þúsundir heimila. Allt að 22 þúsund heimili í landinu þurfi á umtalsverðum skuldbreytingum að halda og með nýju lögunum fækki umtalsvert í þeim hópi. Allt að fimm þúsund heimili munu nýta sér úrræðin, að mati varaformanns félags- og tryggingamálanefndar.

Talsmenn heimila, lánþega og neytenda fagna þessum áfanga, en telja að lengra mætti ganga.

Meðal nýrra laga eru lög um umboðsmann skuldara, sem skal sinna hagsmunagæslu fyrir skuldsett fólk, til dæmis í samningaviðræðum við lánastofnanir. Umboðsmaður skal setja sanngirnisviðmið í samningum og leiða fólk í gegnum greiðsluaðlögun.

„Þetta var mikill gleðidagur," segir félagsmálaráðherra, Árni Páll Árnason. Umboðsmaðurinn geti hafið störf í ágúst. „Það er grundvallarbreyting að við náum að gera fólki kleift að losna undan óviðráðanlegum skuldum," segir ráðherra, en greiðsluaðlögunarúrræði hafa verið milduð og stytt í tíma.

Aðlögunin tekur nú að hámarki þrjú ár og eiga lánardrottnar nú síður að sjá sér hag í því að fara með málin fyrir dóm.

Árni segir umboðsmanninn nauðsynlegan því ekki hafi gengið eftir að láta kröfuhafa semja við skuldara án milligöngu ríkisins.

Lög sem leyfa fólki með tvær fasteignir að setja aðra þeirra upp í skuldir voru einnig samþykkt í gær. Einnig má nefna breytingar á tekjuskattslögum, sem kveða á um skattfrjálsar afskriftir skulda, upp að vissu marki.

Friðrik Ó. Friðriksson, formaður stjórnar Hagsmunasamtaka heimilanna, segir öll málin mikilvæg til að bæta stöðu fólks í greiðsluerfiðleikum. „Þetta eru miklar framfarir í okkar samfélagi. Það er enginn sem deilir um það," segir hann. Úrræðin forði því þó ekki að fleiri lendi í vanda.

Gísli Tryggvason, talsmaður neytenda, segist fagna öllum réttarbótum. „En ég hef nú kallað eftir heildstæðari lausn. Ég held að eftir efnahagshrun þurfi að gera meira," segir hann. Allt séu þetta samt skref í rétta átt.

Guðmundur Andri Skúlason, formaður Samtaka lánþega, gleðst sömuleiðis yfir því að komið sé til móts við vanda heimilanna. Hvert skref skipti máli: „Aftur á móti finnst okkur þetta langt frá því að vera nægilega langt gengið."

- kóþ, þeb /