Ætlast til að bankarnir sætti sig við sanngirnisfrumvarpið

„Við ætlumst til þess að lánveitendur sætti sig við þetta," sagði Árni Páll Árnason, efnahags- og viðskiptaráðherra, í viðtali í Kastljósinu í kvöld um viðbrögð lánastofnanna, það er að segja bankanna, vegna fyrirhugaðs sanngirnisfrumvarps vegna gengisdóms. Ráðuneytið hyggst leggja frumvarpið fram strax á haustþingi.

Frumvarpið mun taka til þeirra flokka lána sem talið er að hafi byggt á ólögmætri gengisbindingu, samkvæmt tilkynningu frá efnahags- og viðskiptaráðuneytinu. Þar segir jafnframt að samkvæmt útreikningum sérfræðinga Seðlabanka Íslands muni eftirstöðvar þessara lána lækka verulega við breytinguna, t.d. um 25% til 47% fyrir 25 ára lán.

„Það er bjargföst trú mín að bankarnir muni axla samfélagslega ábyrgð í þessu máli," sagði Árni Páll spurður hvort hann telji að bankarnir muni sækja rétt sinn í málinu, þá sérstaklega vegna þess að sanngirnisfrumvarpið mun rýra þeirra hag.

Aðspurður hvort samkomulag á milli bankanna og ríkisins sé til staðar sagðist Árni Páll ekki svo vera. Hann sagði ráðuneytið hafa kynnt þeim hugmyndirnar og þær hefði lagst vel í forsvarsmenn bankanna.

Árni segir það hinsvegar skýlausan rétt almennings að sækja sín mál fyrir dómstólum telji þeir á sér brotið.

Árni Páll gerir ráð fyrir því að frumvarpið verði lagt fram strax í næsta mánuði. Hann sagðist ómögulega geta svarað því hvenær frumvarpið yrði samþykkt og sagðist treysta á góða samvinnu innan þingsins vegna málsins.