Tjónið hefði orðið miklu meira ef Sjóvá hefði farið í þrot

Ef Sjóvá hefði farið í þrot hefði það valdið ríkinu mun meira tjóni en sem nemur þeirri upphæð sem ríkið lagði tryggingafélaginu til fyrr á árinu, segir fjármálaráðherra. Með ákvörðun stjórnvalda hafi tekist að koma í veg fyrir stórslys. Alls eru 25 mál er varða ríkisaðstoð til skoðunar hjá eftirlitsstofnun EFTA.

ESA, eftirlitsstofnun EFTA, hóf í vikunni formlega rannsókn á því hvort íslenska ríkið hafi veitt tryggingafélaginu Sjóvá ólögmæta ríkisaðstoð þegar það lagði 11,6 milljarða króna inn í félagið fyrr á árinu.

Steingrímur J. Sigfússon, fjármálaráðherra, segir að um 25 mál sem varða ráðstöfun stjórnvalda hafi verið í skoðun hjá ESA. Stofnunin hafi ekki tekið neina afstöðu til þess hvort um ólöglega ríkisaðstoð hafi verið að ræða í tilfelli Sjóvá, heldur sé verið að skoða málið. Búið sé að ljúka skoðun á nokkrum öðrum málum og hafi stofnunin meðal annars samþykkt endurfjármögnun sparisjóðanna.

„En það eru allmörg mál opin og það er því miður þannig að þær aðstæður sem við höfum þurft að takast á við og ýmsar ráðstafanir sem ríkið taldi sig verða að grípa til kalla á það að mörg samskiptamál hafa komið upp. Og það eru mörg álitamál sem þarf að fara yfir og bera saman við reglurnar um ríkisstyrki," segir Steingrímur

Meðal þess sem fram kemur í ákvörðun ESA er sú gagnrýni að íslensk stjórnvöld hafi ekki tilkynnt stofnuninni áður en ríkið lagði Sjóvá til fjármagn. Steingrímur segir að ekki hafi gefist langur tími til þess að gera slíkt. Þarna hafi eitt af stærstu tryggingarfélögum landsins verið komið í bráðavanda. Ef það hefði farið í þrot, hefði það valdið stórkostlegum skaða og ríkinu trúlega miklu meira tjóni heldur en þó þurfti að leggja að mörkum til að koma því í skjól.

Steingrímur segist sannfærður um að ákvörðunin hafi verið skynsamleg og til þess fallin að koma í veg fyrir stórslys. „Það er nú þannig að ef tryggingafélag kemst í þrot má segja að það sé á margan hátt enn verra en ef banki fer niður. Þá getur komið upp sú staða að viðskiptavinir fái ekki greiddar út bætur sem þeir eiga inni. Eða iðgjöld þeirra séu ónýt og brenni inni í félaginu," segir Steingrímur.

Steingrímur segir það hafa verið mat stjórnvalda að skellurinn af því að Sjóvá kæmist í þrot myndi mælast í tugum milljarða og trúlega lenda á ríkinu.