Hleypur meidd fyrsta maraþonið

„Ég skal komast í mark – en ég er svo hrædd um að ég rústi mér,“ segir veðurfréttakonan Soffía Sveinsdóttir.

Soffía flaug til Þýskalands í gær, en þar hyggst hún taka þátt í Berlínarmaraþoninu á morgun. Hlaupið mun reynast Soffíu erfiðara en ella þar sem hún hefur glímt við hnémeiðsli að undanförnu. „Ég fékk bólgur utan á liðbönd í báðum hnjánum þannig að ég er búin að vera hjá sjúkraþjálfara í mánuð,“ segir hún.

Maraþonið er fyrsta borgarmara-þonið sem hún hleypur, en áður hefur hún tvisvar hlaupið hinn alræmda Laugaveg, 54 kílómetra leið.

Þannig að þetta er bara skemmtiskokk fyrir þig?

„Skemmtiskokk! Það er reyndar allt öðruvísi út af því að maður hleypur allan tímann í maraþoni, en á Laugaveginum labbar maður upp og niður brekkurnar,“ segir Soffía. „Ég bý að æfingunum fyrir Laugaveginn. Ég skráði mig í janúar og það er ekki hægt að hætta við, ég er búin að bóka flug og svona. Þannig að ég fer þetta á þrjóskunni.“

Soffía segir meiðslin hafa orðið til þess að hún slái af tímakröfunum. „Nú er markmiðið að koma í mark, en ég er ekki að fara að gera neinar rósir – enda hefði ég ekki gert það hvort sem er,“ segir Soffía hógvær. - afb