Björgunarsveitir hefja leit að Andrési

Björgunarsveitir á höfuðborgarsvæðinu eru nú að hefja leit að Andrési Tómassyni sem saknað hefur verið af heimili sínu í Reykjavík síðan á föstudag í síðustu viku.

Samkvæmt upplýsingum frá Landsbjörg eru 22 hópar björgunarsveitamanna að aka vegi og slóða í nágrenni höfuðborgarsvæðisins. Mikið hefur rignt á leitarsvæðinu undanfarna daga og því eru margir slóðar illfærir vegna aurbleytu og hægir það á leitarflokkum.

Lögreglan á höfuðborgarsvæðinu lýsti eftir Andrési í fyrradag og í gær var lýst eftir bílnum hans. Þeir sem geta gefið upplýsingar um ferðir Andrésar eru beðnir um að hafa samband við lögregluna í síma 444-1000.