Sveinn Rúnar kominn inn á Gasa

Sveinn Rúnar Hauksson læknir komst í morgun inn á Gasa svæðið en síðustu daga hefur hann ásamt stoðtækjasérfræðingum frá Össuri reynt að komast inn á svæðið með gerfifætur fyrir nauðstadda Palestínumenn. Þær áætlanir hafa engan árangur borið en Sveinn sendi í tölvuskeyti í dag fregnir af því að honum hefði verið hleypt inn á svæðið í morgun.

Í Fréttablaðinu í gær var haft eftir Sveini að hann ætlaði að freista þess að komast inn einn síns liðs til þess að hitta fólk sem hann hefur verið í samskiptum við. „Ég ætla bæði sem læknir að halda áfram að fylgjast með þróun heilsugæslu og sjúkrahúsa þarna, ekki síst með tilliti til geðrænna vandamála. Svo ætla ég líka að eiga viðtöl við þá sem fengu gervifætur í fyrra, sjá og heyra hvernig hefur gengið hjá þeim," sagði Sveinn í samtali við blaðið í gær.