Alþingi sett í dag

Alþingi verður sett með guðsþjónustu í Dómkirkjunni klukkan hálftvö í dag. Forseti Íslands, biskupinn yfir Íslandi, forseti Alþingis, ráðherrar og flestir alþingismenn ganga fylktu liði til kirkjunnar úr Alþingishúsinu þegar klukkan er 25 mínútur gengin í tvö.

Séra Halldóra J. Þorvarðardóttir, prófastur Suðurprófastsdæmis, predikar og séra Hjálmar Jónsson, sóknarprestur í Dómkirkjunni, þjónar fyrir altari ásamt biskupi Íslands, herra Karli Sigurbjörnssyni. Organisti Dómkirkjunnar, Kári Þormar, leikur á orgel og kammerkór Dómkirkjunnar syngur við athöfnina, eftir því sem fram kemur í tilkynningu frá Alþingi. Þingmenn Hreyfingarinnar hafa þegar lýst því yfir að þeir ætli sér ekki að vera við athöfnina í Dómkirkjunni.

Að guðsþjónustu lokinni ganga kirkjugestir til þinghússins. Ólafur Ragnar Grímsson forseti Íslands setur síðan 139. löggjafarþing og að því loknu flytur forseti Alþingis, Ásta R. Jóhannesdóttir, ávarp. Þingsetningarfundi verður síðan frestað til klukkan fjögur. Þegar þingsetningarfundi verður fram haldið klukkan fjögur verður dregið um sæti þingmanna og að því loknu verður fjárlagafrumvarpi fyrir árið 2011 útbýtt.