Elliði Vignisson: Ríkisstjórnin hefur ekki lengur umboð þjóðarinnar

Bæjarstjóri Vestmannaeyja segir að ríkisstjórnin hafi ekki umboð frá þjóðinni og þurfi að fara frá. Stjórnvöld ætli að leggja niður heilbrigðisþjónustu á landsbyggðinni á meðan enn séu góðærisbitar í fjárlögunum sem fyrst þurfi að taka á.

Elliði Vignisson, bæjarstjóri Vestmannaeyja, segir að á annað þúsund manns hafi tekið þátt í mótmælum þar í gær.

Um sé að ræða fjölmennasta borgarafund sem haldinn hefur verið í eyjum.

Elliði var ómyrkur í máli í ræðu sinni á fundinum í gær.

„Við stöndum frammi fyrir því vandamáli að það var góðærisgeðveiki innleidd í ríkisfjármálin og á því þarf að taka. Staðan hins vegar núna er sú að þessi ríkisstjórn er í reynd löngu farin frá," segir Elliði.

Hann segir að ríkisstjórnin hafi ekki umboð frá þjóðinni lengur.

„Og þá breytir einu hversu gott fólk þarna er, á meðan ríkisstjórn ekki hefur umboð til að stjórna landinu verður hún að fara frá, annars verður skaðinn meiri en hann annars þyrfti að vera," segir hann.

Elliði segir að fjárlögin fyrir næsta ár séu illa unnin:

„Þau eru algjörlega óunnin, þetta er niðurskurður sem er úr lausu lofti gripin, það er verið að leggja niður heilbrigðisþjónustu á meðan enn eru þarna góðærisbitar sem fyrst þarf að takast á við. Við erum 300 þúsund manna fiskveiðiþjóð, og við verðum að haga okkur samkvæmt því. Og við verðum að fá ríkisstjórn sem skilur það að við erum 300 þúsund manna fiskveiðiþjóð, við getum boðið upp á góða heilbrigðisþjónustu, góðar samgöngur, löggæslu, menntun og fleira en það verður að taka góðærið út úr fjárlögunum og ef þessi ríkisstjórn hefur ekki skilning á því þá verður hún að finna sér eitthvað annað að gera en að stjórna landinu, hún hefur ekki umboð til þess," segir Elliði að lokum.