Segir Íslendinga ekki þorparana í makrílstríðinu

Friðrik J. Arngrímsson, framkvæmdastjóri LÍÚ, skrifar bréf í breska blaðið The Scotsman í dag þar sem hann segir að Íslendingar séu ekki þorparar í stríðinu um makrílinn.

Bréf Friðriks er svar við grein skoska stjórnmálamannsins Struan Stevensson sem hélt því fram að Íslendingar hefðu aukið makrílkvóta sinn um 6.500 prósent og sagði Íslendinga yfirgangsseggi. Friðrik færir rök fyrir máli sínu með því að benda á að Íslendingar hafi veitt 112 þúsund tonn af makríl árið 2008 og síðan 116 þúsund tonn ári síðar. Kvóti þess árs sé 130 þúsund tonn. Friðrik bendir á að Íslendingar hafi verið skildir útundan í samningaviðræðum um makrílveiðar og því hafi íslenska ríkið sett sjálfu sér kvóta, 130 þúsund tonn. Þessi ákvörðun hafi verið tekin áður en viðræðum annarra ríkja um kvótann, sem Íslendingar fengu ekki að taka þátt í, var lokið.