Þverpólitísk kvikmyndahátíð

Græna ljósið blæs til mikillar kvikmyndaveislu í Regnboganum. Hátíðin stendur í þrjár vikur og hefst 16. apríl. „Við ætlum að leggja Regnbogann undir okkur og þar verða engar aðrar myndir sýndar en kvikmyndir Bíódaga," segir Ísleifur B. Þórhallsson, skipuleggjandi hátíðarinnar.

Ísleifur segir „þverpólitíska" sátt vera að myndast milli dreifingaraðila kvikmynda á Íslandi því bæði Sena og Myndform ætla að leggja til kvikmyndir og þá hefur Ísleifur verið í sambandi við Sam-film um að þeir komi einnig að kvikmyndahátíðinni.

Ísleifur segir að þeir hafi valið myndirnar á hátíðina af kostgæfni og verið tiltölulega harðir við sjálfa sig. „Við ætlum okkur að hafa mjög háan gæðastuðul og við erum búnir að henda út fullt af myndum sem komu til greina," segir Ísleifur. Blásið verður til mikils teitis 16. apríl þar sem boðið verður upp á óvissusýningu í hverjum sal og svo heljarinnar partí eftir að sýningu lýkur.

Meðal þeirra kvikmynda sem verða að öllum líkindum teknar til sýningar má nefna Imaginarium of Dr. Parnassus en það er síðasta myndin sem Heath Ledg-er lék í. Þá er líklegt að teiknimyndin Fantastic Mr. Fox verði einnig sýnd, en hún var tilnefnd til Óskarsverðlauna sem besta teiknimyndin í ár. Til gamans má geta að George Clooney og Meryl Streep tala fyrir Fox-hjónin.

Þá bendir allt til þess að heimildarmyndin Videocracy verði tekin til sýningar, en hún segir frá ótrúlegri frægðarmannadýrkun á Ítalíu, og svo austurríska kvikmyndin Das weisse Band eða Hvíti borðinn sem vann aðalverðlaunin í Cannes og var tilnefnd til Óskarsverðlauna í ár í flokknum besta erlenda myndin. - fgg