Óttast metár í alnæmissmitum

„Við hörmum þetta að sjálfsögðu en þetta hefur samt legið í loftinu," segir Gunnlaugur Grétarson, formaður Alnæmissamtaka Íslands, en óvanalega margir einstaklingar hafa sýkst af HIV á síðustu þremur mánuðum.

Fram kom í farsóttafréttum í dag að ellefu manns hafa greinst með HIV smit frá því í byrjun ágúst hér á landi.

Haraldur Briem, sóttvarnarlæknir, segir aukninguna í raun holskeflu.

Gunnlaugur segir þróunina nú í takt við það sem er að gerast í öðrum löndum. Hann segir sprautufíkla til að mynda fyrirferðameiri varðandi þá sem sýkjast af veirunni banvænu en áður.

„Þetta er líklega það sem við munum sjá í framtíðinni," segir Gunnlaugur en mest er aukningin á meðal fíkniefnaneytenda en einig eru innflytjendur frá löndum þar sem alnæmi er útbreitt töluverður hópur.

Þá er einnig aukning í smitum á meðal samkynhneigðra. Gunnlaugur segir það vonbrigði, enda hafa samkynhneigðir hingað til verið best meðvitaðir um hættuna á alnæmissmiti.

„Umræðan liggur dálítið niðri og það er kæruleysi víða," segir Gunnlaugur en það stefnir í metár í alnæmissmitum hér á landi. Nú hafa jafn margir smitast og árið 1985 þegar mest var, eða sextán einstaklingar.

Spurður hvað sé til ráða segir hann margt hægt að gera. Gunnlaugur segir til að mynda mikilvægt að lækka verðið á smokkum og gagnrýnir harðlega háa skatta á þeim.

„Þeir eru eiginlega bara orðnir munaðarvara," segir Gunnlaugur og bendir á að klamydíusmit hafi einnig aukist. Hann rekur þá þróun meðal annars til dýrra smokka.

Gunnlaugur segir líka kominn tíma á að koma til móts við fíkla hér á landi.

Það þurfi að auðvelda aðgengi þeirra að sprautunálum. Hann segir helsta fíkniefni sprautufíkla hér á landi vera rítalín. Þeir sem neyta þess þurfa bæði stærri sprautur og þurfa einnig að sprauta sig oftar en til að mynda heróín-fíklar.

„Þar af leiðandi eru fleiri inngrip í líkamann sem fylgja fleiri sýkingar og svo framvegis," segir Gunnlaugur sem vill auðvelda aðgengi sprautufíkla að nálum.

Gunnlaugur vonar að þessi þróun verði til þess að umræðan opnist frekar um málefnið. Hann segir vakningu nauðsynlega.

Alnæmissamtökin eru með aðstöðu á Hverfisgötu 69. Þar er opið frá 12 til 16:00.