Mikið vatn í ám við Eyjafjallajökul - en ekki ennþá rignt

„Það er búið að vera rosalega dökkt yfir hérna í morgun og ég myndi segja að það séu meiri líkur en minni að það fari að rigna," segir Ólafur Eggertsson bóndi á Þorvaldseyri.

Veðurstofan varaði við stormi suðvestantil á landinu og mikilli úrkomu á Suðurlandi í dag. Þá var spáð því að áköf úrkoma myndi byrja klukkan tvö við Eyjafjallajökull. Ólafur segir að ekkert hafi rignt í dag en þó sé rosalega hvasst, allt upp í 40 metrar á sekúndu.

„Það er alveg þurrt hérna núna og það gæti farið að rigna þegar það lægir. Þó það hafi ekkert rignt í dag þá fór ég í morgun að brúnni yfir Svaðbælisá og þar er allt fullt," segir Ólafur sem er þó ekkert smeykur við tjón sem gæti hlotist af flóðum í ám á svæðinu. „Ég vona bara að varnargarðarnir haldi en farvegurinn hefur hækkað töluvert þrátt fyrir að ekkert hafi rignt," segir Ólafur.

Veðurstofan segir að úrkoman verði í formi snjókomu á jöklinum sjálfum og niður í hlíðarnar en síðan taki við slydda eða rigning.