Hafa áhyggjur af háskólanemum

Stjórn Sambands ungra framsóknarmanna lýsir yfir miklum áhyggjum af framfærslumöguleikum háskólanema í sumar. Óvíst sé hvort háskólanemum við Háskóla Íslands, fjölmennasta háskóla landsins standi til boða lánshæf námskeið í sumar auk þess sem réttur námsmanna til atvinnuleysisbóta hafi verið afnuminn. Þá sé óljóst hvort öll sveitarfélög komi til með að veita námsmönnum fjárhagsaðstoð yfir sumartímann þrátt fyrir framfærsluskyldu. Þetta kemur fram í ályktun frá stjórn SUF.

„Ljóst er að það óvissuástand sem nú er uppi kemur illa við marga námsmenn sem bíða í örvæntingu eftir lausnum frá yfirvöldum menntamála. Sérstaklega bitnar ástandið á þeim sem ekki eiga fjárhagslegan bakhjarl, ungum fjölskyldum og einstæðum foreldrum," segir í ályktuninni.

Stjórn Sambands ungra framsóknarmanna skorar á menntamálaráðherra að standa við hástemmd orð sín og yfirlýsingar um jafnrétti til náms, tryggja aðgang að lánshæfu námi við opinbera háskóla í sumar með ásættanlegu námsframboði og beita sér fyrir viðeigandi úrræðum fyrir atvinnulausa námsmenn.