30 ár frá kjöri Vigdísar

Vigdís Finnbogadóttir var kjörin forseti Íslands á þessum degi árið 1980 og gegndi því embætti til ársins 1996. Hún var fyrsta konan í heiminum sem kosin var þjóðhöfðingi í lýðræðislegum kosningum.

Fjórir gáfu kost á sér í kosningunum en auk Vigdísar voru það þeir: Albert Guðmundsson fyrrverandi þingmaður og ráðherra, Guðlaugur Þorvaldsson fyrrverandi háskólarektor og ríkissáttasemjari og Pétur J. Thorsteinsson fyrrverandi sendiherra og ráðuneytisstjóri.

Í tilefni dagsins efna Háskóli Íslands og Stofnun Vigdísar Finnbogadóttur í erlendum tungumálum til hátíðarfundar í dag þar sem þessara tímamóta verður minnst.

Á fundinum mun Laura Liswood, framkvæmdastjóri Council of Women World Leaders, halda fyrirlestur um kjör Vigdísar og þýðingu þess fyrir jafnréttisbaráttu kvenna víðs vegar um heim. Yfirskrift fyrirlesturs hennar er „The Power of the Mirror".

Fundarstjóri er Kristín Ingólfsdóttir, rektor Háskóla Íslands. Hátíðarfundurinn sem öllum er opinn fer fram í Öskju, náttúrufræðahúsi Háskóla Íslands og hefst hann klukkan 12:00.