Hagsmunum landsbyggðarinnar ekki fórnað fyrir hátæknisjúkrahús

Fullyrðingar um að verið sé að fórna hagsmunum landsbyggðarinnar fyrir hátæknisjúkrahús eru ómaklegar og beinlínis rangar segir forstjóri Landspítalans.

Eyþór Arnalds, formaður bæjarráðs Árborgar, fjallaði nýlega um niðurskurð á sjúkrastofnunum á Suðurlandi og annar staðar á landsbyggðinni. Í grein í Dagskránni á Suðurlandi segir hann að eina haldbæra skýringin á niðurskurðinum sé sú að menn vilji færa langflestar aðgerðir landsmanna til Reykjavíkur. Heldur Eyþór því fram að þetta sé gert til að réttlæta það sem hann kallar svokallað „hátæknisjúkrahús." Spyr Eyþór hvort ekki væri nær að fresta eða hætta við þessa nýbyggingu og nýta betur þá innviði sem við höfum nú þegar fjárfest í.

Björn Zoëga, forstjóri Landspítalans, bendir á hátæknisjúkrahúsið verði fjármagnað með fé frá lífeysissjóðum. Ekki sé gert ráð fyrir að fé af fjárlögum renni til sjúkrahússins.

„Það voru sett lög Alþingi í vor um stofnun opinbers hlutafélags sem hefur það hlutverk að fjármagna og byggja svokallaðan nýjan spítala, það er hluta af spítalanum, og það kemur ekki inn á fjárlög á nokkurn hátt heldur er þetta fjármagnað með hjálp lífeyrissjóðanna." segir Björn.

Hann segir umræðu á borð við þá sem birtist í grein Eyþórs ósanngjarna. „Landspítali er spítali allra landsmanna. Þetta er sérhæft sjúkrahús. Hingað eru sjúklingar sendir þegar lokað er annars saðar er lokað eða ekki hægt að veita þjónustu annars staðar."

Í fyrirlestri í Landspítalanum í gær fjallaði Björn um fjárheimildir til sjúkrahúsa og sjúkrastofnanna út frá tölum frá Hagstofunni. Þar benti hann á að fjárheimildir til Landspítala hafa lækkað í átta ár eða frá árinu 2002. Á sama tíma hafa þær hins vegar vaxið á öðrum heilbrigðisstofnunum. Honum þykir því umræða um að verið sér að skera niður á sjúkrastonunum út á landi til að vernda hagsmuni Landspítalans og höfuðborgarbúa á villigötum. Sérstaklega í ljósi þess að á skömmum tíma hefur starfsmönnum fækkað um 627 og ekki er útlit fyrir annað en 80 manns til viðbótar þurfi að hætta innan skamms og einhverjum deildum þurfi að loka.