Húðkrabbi ekki einkamál unga fólksins

Eldri borgurum sem leita læknisaðstoðar vegna húðkrabbameins fer fjölgandi, segir Baldur Tumi Baldursson húðlæknir. Hann segir að húðkrabbamein séu síður en svo einkamál unga fólksins.

Baldur Tumi sagði í samtali við Reykjavík síðdegis á Bylgjunni í gær að um væri að ræða hóp eldri borgara sem dveldi langdvölum í sól erlendis. Hann sagði að þetta fólk væri ekki endilega mikið í sólböðum heldur væri það bara mikið úti við. Baldur Tumi varar fólk, sérstaklega konur, við því að vera mikið úti í sól með bera handleggi eða bera fótleggi.

Sú tegund krabbameins sem unglingar fá vegna mikillar ljósabekkjanotkunar er svokallað sortuæxli. Baldur Tumi segir að þetta sé ekki sú tegund húðkrabbans sem eldra fólkið fær vegna langra dvala erlendis heldur sé þá um að ræða svokölluð flöguþekjukrabbamein og grunnfrumukrabbamein.