Frábær viðbrögð við fylgishruni

Borgarfulltrúi Besta flokksins segir viðbrögð sín við fylgishruni flokksins frábær. Hann segir flokkinn hafa verið óhræddan við að taka óvinsælar ákvarðanir og það taki lengri tíma en sex mánuði að breyta hlutunum í borginni.

Meirihlutinn félli ef kosið væri nú, Besti flokkurinn tapaði tveim mönnum og sjálfstæðisflokkurinn væri stærstur í borginni samkvæmt nýrri könnun, sem gerð var af Capacent Gallup fyrir Sjálfstæðisflokkinn.

„Mín viðbrögð eru náttúrulega alveg frábær. Mér finnst mjög skemmtilegt að heyra að svona skoðanakönnun hafi verið gerð. Mér finnst þetta hljóma mjög vel," segir Einar Örn Benediktsson, borgarfulltrúi Besta flokksins.

Ekki vonbrigði

„Það eru engin vonbrigði að Besti flokkurinn sé að tapa fylgi. Ég held að ef menn vilja fara að rýna í þetta eins og þeim sýnist, þá er það alltaf þannig að eitthvað fylgi hrynur af. Við höldum okkar striki, við vitum hvað við erum að gera, þó aðrir segja að við vitum það ekki."

Einar Örn bætir við að árið 2011 verði líklegast erfiðasta árið í rekstri borgarinnar, og Besti flokkurinn hafi verið óhræddur við að taka óvinsælar ákvarðanir. Hann segir að fólk sé óánægt með gjaldskrár- og útsvarshækkanir, en þær séu þó nauðsynlegar. Hann segir þjónustuna í Reykjavík enn með þeim ódýrari á landinu þrátt fyrir þær hækkanir sem þurfi til að viðhalda henni. Þá hafi meirihlutinn einnig ráðist í hagræðingu í stjórnsýslunni.



Þarf meira en sex mánuði

Í kvöldfréttum Stöðvar 2 í gær skýrði Hanna Birna Kristjánsdóttir, oddviti Sjálfstæðismanna, fylgishrunið með því að fólk hafi átt von á annarskonar vinnubrögðum frá meirihlutanum.

„Það þarf alveg örugglega miklu meira en sex mánuði til þess að byrja að breyta hlutunum," segir Einar Örn við þeirri skýringu.

„Ef við hefðum kollsteypt öllu á fyrstu þremur mánuðunum, þá værum við að fá sömu niðurstöðu út úr þessu, að fólk væri ekki ánægt með okkur af því við værum að rústa öllu niður. Við erum að forgangsraða í þá átt sem okkur þykir best, við erum að hugsa um Reykvíkinga.

„Það er bara þannig að það þarf að hækka þjónustugjöld og önnur gjöld, það er hlutur sem þarf að gera. Fólk er óánægt með það, en það þarf að gera það," segir Einar.



Ekki vitleysingar í Besta flokknum

Eru þetta skilaboð frá kjósendum sem meirihlutinn þarf að bregðast við með einhverjum hætti?

„Meirihlutinn er búinn að bregðast við með þeim hætti sem ástandið býður upp á. Ástandið býður ekki upp á draumóra eða vitleysu. Við höfum aldrei sagt að við værum vitleysingar eða draumóramenn í Besta flokknum. Við reynum að vinna úr því sem fyrir okkur er lagt og búa til það mesta úr því sem við höfum. Það höfum við gert. Við erum ekki að fara í neitt pólitískt karp um eitthvað annað."