Flugstöðin orðin bleik

Flugfarþegar á leið um Flugstöð Leifs Eiríkssonar eiga von á því að sjá flugstöðina í nýjum búningi í október því vegna átaks Krabbameinsfélags Íslands hefur flugstöðin verið sveipuð bleikum ljóma.

Hefð hefur verið fyrir því að lýsa byggingar upp í bleikum lit í októbermánuði og mun flugstöðin verða bleik út mánuðinn.

Bleika slaufan, árvekni- og fjáröflunarátak Krabbameinsfélags Íslands, hófst formlega á föstudag og hefur félagið sett sér það markmið að selja 50 þúsund slaufur fram til 15. október þegar slaufusölunni lýkur. Í ár var í fyrsta sinn haldin samkeppni um hönnun bleiku slaufunnar og bar Ragnheiður I. Margeirsdóttir sigur úr býtum.