Körfuknattleiksmenn þurfa að skila sakavottorði frá FBI

Frá og með deginum í dag þurfa Bandaríkjamenn sem sækja um dvalarleyfi hér á landi að skila inn sakavottorði frá bandarísku alríkislögreglunni, FBI. Þetta gildir um þá sem búið hafa í Bandaríkjunum í fimm ár eða lengur. Áhrif þessara breytinga teygja sig víða og þurfa leikmenn sem koma hingað til lands á vegum Körfuknattleikssambands Íslands margir hverjir að aðlaga sig nýjum reglum.

Kristinn Geir Pálsson, íþróttafulltrúi Körfuknattleikssambandsins, fundaði með fulltrúum Útlendinaeftirlitsins fyrir helgi vegna breytinganna og bíður eftir svörum um hvernig hægt er að gera umsóknarferlið sem einfaldast. Kristinn Geir bendir á að fyrir hafi það verið heldur flókið að sækja um dvalarleyfi og mikilvægt að allar upplýsingar um breytt ferli séu sem aðgengilegastar.

Samkvæmt nýjum reglum eru sakavottorð frá einstökum fylkjum eru ófullnægjandi þar sem þau ná einungis yfir það tiltekna fylki sem gefur vottorðið út og erfitt hefur verið að fá þau staðfest af viðeigandi stjórnvöldum.

Tólf lið eru í efstu deild karla í Iceland Express-deildinni og má einn leikmaður hvers liðs koma frá landi utan evrópska efnahagssvæðisins. Yfirleitt koma þessir leikmenn frá Bandaríkjunum. Átta lið eru í efstu deild kvenna og eru dæmi um að bandarískar konur spili í þeim liðum. Þessar breytingar hjá Útlendingaeftirlitinu snerta körfuknattleiksliðin því beint.