Fágæt íslensk frímerki á uppboði: Gætu farið á tugi milljóna

Íslensk skildingaumslög eru ákaflega fágæt og þykja því mikil tíðindi í heimi frímerkjasafnara þegar slík umslög eru falboðin. Eitt örfárra íslenskra skildingaumslaga sem er í einkaeigu verður selt á uppboði hjá Thomas Hojland í Danmörku í byrjun næsta mánaðar. Lægsta boð er rúmar 200 þúsund danskar krónur eða um fjórar milljónir íslenskra króna. Viðbúið er að skildingaumslagið verði selt mun hærra verði.

Hallur Þorsteinsson, formaður Félags frímerkjasafnara, býst við því að einhverjir Íslendingar bjóði í umslagið en telur ólíklegt að Íslendingar verði á meðal þeirra sem slást um það á endanum.

Fíkn að safna frímerkjum

„Mig rekur minni til þess að umslag var selt í Sviss fyrir nokkrum árum fyrir rúmar fjörutíu milljónir króna. Þetta er ekki á færi venjulegra manna. Þessi söfnun verður hálfgerð fíkn hjá mörgun. Menn eru tilbúnir til að fórna miklu. Sumir jafnvel fórna fasteignum. Þegar við erum komin út í þessar háu upphæðir þá eru kaupin hreinlega bara fjárfesting. Svona hlutir halda verðgildi sínu ansi lengi," segir Hallur. Auk þessa fullnægja frímerkjakaupin þrá margra forfallinna frímerkjasafnara til að eiga gott og fallegt safn.

Hallur bendir á að skildingaumslagið sem seldist á um fjörutíu milljónir hafi verið einstaklega vel með farið og verðgildi þess því meira en ella. Lítillega sér á umslaginu sem nú er til sölu og verður það líklega til þess að það fer ekki á jafn háu verði.

Hallur stefnir sjálfur ekki að því að bjóða í umslagið, bæði því skildingaumslögin séu ekki sérstaklega á hans áhugasviði og vegna þess á hversu háu verði það verður liklega selt.

Verðlaunað frímerkjasafn



Íslensku skildingamerkin voru gefin út í kring um 1873. „Það eru veruleg tíðindi að þetta umslag sé boðið til sölu. Þetta er svo sjaldgæft," segir Hallur. Hann býst við að uppboðið verði til að glæða áhuga íslenskra philatelia, eins og hann kallar frímerkjasafnara upp á latínu.

Flest íslensku skildingamerkin eru í eigu sænska greifans Storckenfeldt sem tók snemma við þau ástfóstri. Að sögn Halls eru merkin þó einnig til í einhverjum söfnum hér á landi. Hann bendir sérstaklega á verðlaunað safn Indriða Pálssonar sem er eitt frægasta frímerkjasafn á Íslandi.

Frímerki á undanhaldi

Hallur segir miður hversu mjög hefur dregið úr notkun frímerkja á síðari árum. „Það virðist vera stefna póstyfirvalda að frímerkja sem allra minnst og stimpla frekar umslög eða nota límmiða. Það er er sorgleg staðreynd að mörg börn eða unglingar vita varla hvað frímerki er," segir hann en bindur vonir við að frímerkjasöfnun blómstri áfram sem aldrei fyrr.