Tvær konur handteknar fyrir mannrán í Kópavogi

Tvær konur á þrítugsaldrinum voru handteknar í dag grunaðar um að hafa svipt rúmlega tvítugri konu frelsi sínu. Þá eru þær einnig grunaðar um að hafa beitt hana líkamlegu ofbeldi.

Konurnar sem eru í haldi lögreglunnar eru um 25 ára gamlar en konan sem var rænt er litlu yngri, eða rétt rúmlega tvitug.

Konunni á að hafa verið rænt fyrir utan verslun í Kópavoginu um klukkan fimm í dag.

Fréttavefur DV greinir frá því að konurnar hafi neytt fórnarlamb sitt í skott á bifreið og ekið svo á brott.

Lögreglan á eftir að yfirheyra konurnar en grunur leikur á að þær séu undir áhrifum fíknefna. Ekki er ljóst hvað þeim gekk til.