Útvíkka forvarnarverkefni

Strætó bs. og VÍS munu næstu sex vikur standa fyrir Öryggisdögum, átaki sem miðar að því að fækka slysum í umferðinni og auka öryggi vegfarenda. Átakið er liður í forvarnarverkefni sem fyrirtækin hafa unnið saman að frá ársbyrjun 2008 og hefur leitt til fækkunar umferðaróhappa hjá Strætó, að því er fram kemur í tilkynningu. Með Öryggisdögum er verkefnið útvíkkað þannig að allir þátttakendur í umferðinni eru hvattir til að sýna aðgát, tillitssemi og ábyrga hegðun á götum úti.

Forvarnarstarf fyrirtækjanna efur m.a. falist í atvikaskráningu, áhættugreiningu, eftirfylgni og þjálfun starfsfólks og hefur það leitt til árlegrar fækkun tjóna síðustu ár. Árið 2006 voru tjónin 304, árið 2007 voru þau 297, árið 2008 fóru þau niður í 268 og á síðasta ári var tjónafjöldi orðinn 197. Það sem af er ári virðist sem enn meiri fækkun tjóna náist í ár.



Gera mistök eins og aðrir

„Markmið Öryggisdaganna eru í sjálfu sér einföld - við hjá Strætó bs. ætlum að vera öðrum fyrirmynd í umferðinni svo við getum öll komist heil heim," segir Reynir Jónsson, framkvæmdastjóri Strætó bs.

„Í umferðinni eru vagnstjórar, sem og aðrir atvinnubílstjórar, oft sagðir fara ógætilega, sýna tillitsleysi og fylgja ekki lögum og reglum. Oftast er þetta ómaklegt, en á því miður stundum við rök að styðjast. Við erum mannleg og gerum okkar mistök eins og aðrir."



Eilífðarverkefni

Gísli Nils Einarsson, forvarnarfulltrúi hjá VÍS, segir árangur Strætó bs. í forvörnum og fækkun slysa síðustu ár aðdáunarverðan. „Ég hvet alla til að taka skilaboðin sem felast í Öryggisdögunum til sín, fylgja fordæmi strætisvagnabílstjóranna og leggja sitt af mörkum til að gera umferðina sem öruggasta. En ég minni líka á að við erum ekki bara að tala um næstu sex vikur, heldur er þetta eilífðarverkefni - sem þarf engu að síður að hefjast strax í dag, segir Gísli.