Borgarstjóri spenntur fyrir Kópavogstattúi - vill sameiningu

Jón Gnarr, borgarstjóri, segir að með því að sameina sveitarfélögin á höfuðborgarsvæðinu myndu milljarðar sparast á ári hverju. Hann vill að Reykjavík og Kópavogur fari að huga að sameiningu. Þetta kemur fram í dagbókarfærslu Jóns á samskiptavefnum Facebook.

„Við myndum spara milljarða á hverju ári með því að sameina sveitarfélögin á höfuðborgarsvæðinu. Reykjavík og Kópavogur ættu að fara að skoða þetta af alvöru, skera niður í yfirbyggingu og auka þjónustu við íbúa," segir Jón.

Fjörugar umræður sköpuðust í kjölfarið og sagði Jón meðal annars:

„Ef þetta tekst þá fæ ég mér Kópavogs tattú á hægri handlegginn!" Eins og frægt er orðið fékk Jón sér í byrjun mánaðarins húðflúr af skjaldarmerki Reykjavíkur á framhandlegg sinn.