Marinó gefur fullyrðingum Þórólfs falleinkunn

Marinó G. Njálsson, ráðgjafi og stjórnarmaður í Hagsmunasamtökum heimilanna, segir Þórólf Matthíasson, prófessor í hagfræði við Háskóla Íslands, bregðast frumskyldu sinni sem fræðimanns. Ennfremur gefur Marinó fullyrðinum Þórólfs falleinkunn í pistli á heimasíðu sinni og heldur því áfram að gagnrýni fræðimenn sem hafa tjáð sig undanfarna daga um Hagsmunasamtök heimilanna og almenna niðurfærslu lána.

Marinó gerir að umfjöllunarefni sínu pistil sem Þórólfur skrifaði nýverið í Fréttablaðið. Þar segir hagfræðiprófessorinn að flöt niðurfærsla húsnæðislána myndi ekki aðeins lækka skuldir heimilanna heldur myndi hún einnig hafa mikil neikvæð áhrif á eignahliðinni. „Efalítið yrði staða sumra heimila örlítið skárri eftir niðurfærslu en var áður. En fyrir mörg önnur heimili yrði niðurstaðan neikvæð. Flöt niðurfærsla húsnæðislána er því ekki fallin til að bæta stöðu heimilanna í landinu, þvert á móti," segir Þórólfur.

Um þetta segir Marinó: „Fullyrðing Þórólfs Matthíassonar fengi falleinkunn í mínu fagi, þar sem hún er algjörlega ósönnuð, ekki studd neinum rökum og engin næmnigreining er gerð á henni."