Hvetur Kínverja til að taka þátt í baráttunni fyrir mannréttindum

Ólafur Ragnar Grímsson, forseti Íslands, ítrekar fyrri hvatningar sínar til kínverskra ráðamanna og beinir því til alþjóðasamfélagsins að það sameinist í baráttunni fyrir mannréttindum svo að málfrelsi verði hvarvetna virt og engir séu hnepptir í fangelsi vegna skoðana sinna.

Þetta kemur fram í yfirlýsingu frá forsetanum vegna fyrirspurna um það hvort hann hyggist hvetja kínversku ríkisstjórnina til þess að sleppa handhafa friðverðlauna Nóbels, Liu Xiaobo, úr haldi. Xiaobo afplánar 11 ára fangelsisdóm þar í landi.

Í svari frá forsetaskrifstofunni kemur fram að Ólafur Ragnar Grímsson, forseti Íslands, hafi í um áratug rætt mannréttindi og stöðu mótmælenda við kínverska leiðtoga við fjölmörg tækifæri. Allt frá því að Li Peng, þáverandi forseti kínverska þingsins, kom til Íslands árið 2000 í boði Alþingis. Þá hafi forseti Íslands afhent Li Peng Mannréttindayfirlýsingu Sameinuðu þjóðanna sem nýlega hafði verið gefin út á kínversku af mannréttinda­stofnuninni í Svíþjóð sem kennd er við Raoul Wallenberg.