Flokksstjórn í startholunum

Búist er við að flokksstjórn Samfylkingarinnar verði kölluð saman með skömmu fyrirvara í tengslum við fyrirhugaða uppstokkun á ríkisstjórninni. Til stendur að fækka ráðherrum um tvo.

Fulltrúar í flokksstjórn Samfylkingarinnar sem fréttastofa ræddi við í kvöld telja líklegt að flokksstjórnin verði boðuð til fundar á morgun svo hægt verði að kalla ríkisráð saman á fimmtudagmorgun áður en Alþingi verður sett. Flokksstjórn Samfylkingarinnar hefur milli landsfunda æðsta vald í öllum málefnum flokksins, þar á meðal er flokksstjórn ætlað að staðfesta ráðherralista flokksins.

Fækkun ráðuneyta hefur lengi verið Jóhönnu Sigurðurdóttur, forsætisráðherra, hugleikin og hefur hún þrýst á að ná breytingunum í gegn. Ljóst þykir að bæði Ragna Árnadóttir, dómsmálaráðherra, og Gylfi Magnússon, efnahags- og viðskiptaráðherra, verði látin fara. Ekki liggur fyrir hver mun fylgja þeim en nöfn Álfheiðar Ingadóttir, heilbrigðisráðherra, og Kristjáns Möller, samgönguráðherra, eru nefnt í því samhengi. Oddný Harðardóttir, þingmaður Samfylkingarinnar, og Ögmundur Jónsson, þingmaður VG, taka líklegast sæti í stjórninni.