Rúmlega 50% vilja að kosið verði innan 6 mánaða

Rúmlega 50% svarenda í skoðanakönnun MMR vilja að kosið verði til Alþingis innan 6 mánaða, en rúm 30,7% vilja að kosið verði í lok kjörtímabilsins. Könnunin var gerð dagana 5. - 8. október síðastliðinn.

MMR gerði sambærilega könnun í aðdraganda að alþingiskosningunum í fyrra, rétt fyrir stjórnarslit Samfylkingarinnar og Sjálfstæðisflokksins. Þá kom í ljós að um 61% vildu alþingiskosningar innan 6 mánaða en 14,4% svarenda voru þá á því að kjósa ætti í lok kjörtímabils.

Fjölmenn mótmæli voru haldin á Austurvelli við þingsetningu á föstudag fyrir viku og svo aftur þegar forsætisráðherra flutti stefnuræðu á mánudaginn. Jóhanna Sigurðardóttir forsætisráðherra sagði í stefnuræðu sinni að ýmsir þingmenn kalli nú eftir kosningum. Muni nýtt þing, ný ríkisstjórn og tafarlausar kosningar auðvelda úrlausn þeirra viðamiklu verkefna sem framundan séu, þá myndi ekki standa á henni að víkja til hliðar. Hún og ríkisstjórn hennar myndu hins vegar ekki skorast undan því að ljúka þeim verkefnum sem við blasi, sé það vilji þingsins.