Fiskarnir synda á ný í Vesturbæjarlaug

Hulunni var svipt af forláta fiskabúri í anddyri Vesturbæjarlaugar í gær. Mímir, vináttufélag Vesturbæjar, stóð fyrir söfnun meðal íbúa Vesturbæjar og í gær varð afraksturinn öllum ljós.

„Þetta er merkur áfangi sem við erum að ná hérna í dag,“ sagði Einar Gunnar Guðmundsson, forsvarsmaður Mímis, við þetta tilefni og bætti við: „Þetta er verkefni sem byggist á skemmtilegu „konsepti“ sem við getum kallað íbúafrumkvæði og byggist á gömlum og góðum gildum. Við erum mjög stolt af því að hafa átt frumkvæði af því að borgararnir hafi áhuga, vilja og getu til þess að hafa áhrif á sitt nærumhverfi.“

Lengi vel stóð fiskabúr í anddyri laugarinnar sem hannað var af Gísla Halldórssyni arkitekt. Það var hins vegar tekið niður árið 1985. Gísli, sem verður 96 ára á árinu, var verndari söfnunarinnar og las Margrét Leifsdóttir, barnabarn hans og einn hönnuða nýja búrsins, upp ávarp frá honum við afhjúpunina. Í því kom fram að gamla fiskabúrið hefði verið sérlega vinsælt hjá unga fólkinu.

Hönnuðir búrsins að þessu sinni eru Bjarki Gunnar Halldórsson arkitekt, Margrét Leifsdóttir og Sigurður Gunnarsson verkfræðingur. Allir sem að verkefninu komu gáfu vinnu sína og nánast allur útlagður kostnaður var vegna efnis. Íþrótta- og tómstundaráð mun taka við rekstri búrsins.

Félagar í Mími eru ekki hættir þótt fiskabúrið sé komið upp, að því er kom fram í gær, fleiri verkefni bíði í Vesturbænum. Þeir hittast einu sinni í mánuði á Mímisbar á Hótel Sögu. Allir áhugamenn um Vesturbæinn eru velkomnir á fundi félagsins.

magnusl@frettabladid.is