Vonar að framkæmdir við Búðarhálsvirkjun hefjist fljótlega

Katrín Júlíusdóttir, iðnaðarráðherra, vonar að framkæmdir við Búðarhálsvirkjun hefjist eftir nokkrar vikur. Ákvörðun umhverfisráðherra um að neita að staðfesta skipulagsbreytingar varðandi virkjanir í neðri Þjórsá hamla ekki uppbyggingu álvers í Helguvík. Rangt sé að halda öðru fram, að mati iðnaðarráðherra.

Þetta kom fram í máli Katrínar á Alþingi í dag þegar að Kristján Þór Júlíusson, þingmaður Sjálfstæðisflokks, spurði hana út í ummæli Harðar Arnarsonar, forstjóra Landsvirkjunar, í kvöldfréttum Stöðvar 2 í gær. Þar sagði Hörður að atvinnuuppbygging, sem nýtt hefði orku neðri Þjórsár, komi til með að tefjast um eitt til tvö ár vegna ákvörðunar Svandísar Svavarsdóttur, umhverfisráðherra, að hafna skipulagi Þjórsárvirkjana.

Kristján spurði Katrínu hvaða aðrir kostir væru í stöðunni. Ráðherrann sagði fjölmarga aðra kosti vera á borðinu varðandi orkuuppbyggingu. Landsvirkjun leggi áherslu á svæðin fyrir norðan við Húsavík. Stóra verkefnið þar væri markaðs- og kynningarmál og vekja þannig athygli fjárfesta. ;ikil eftirspurn væri eftir grænnri orku.

Kristján sagði aftur á móti ljóst að orka á Norðurlandi komi ekki til með að nýtast við atvinnuuppbyggingu á Suðvesturhorninu sem hann spurði sérstaklega út í.

Katrín benti á að Landsvirkun hafi gert samninga við Verna Holding um orkusölu vegna uppbyggingu gagnavers. Landsvirkjun hafi hins vegar aldrei verið hluti af samkomulagi um álverið í Helguvík og því hamli ákvörun umhverfisráðherra um skipulagsbreytingar varðandi virkjanir í neðri Þjórsá ekki uppbyggingu álversins.