Stympingar á milli stuðningsmanna í nágrannaslag á Akureyri

„Ég er KA-maður sjálfur og skammast mín fyrir það eftir þetta," segir Ingvi Hrannar Jónsson, stuðningsmaður KA sem fór á heimavöll liðsins í kvöld til að sjá lið sitt keppa á móti erkifjendunum í Þór í 1. deildinni í kvöld.

Margir hafa sótt völlinn þegar að þessi tvö lið mætast en í kvöld sauð upp úr í stúkunni hjá stuðningsmönnum KA þegar að tveir Þórsarar komu yfir til að ögra þeim, að sögn Ingva. Hann varð vitni að átökunum og segir að ölvun hafi verið mikil á svæðinu og ekki hafi gæslumenn verið sjáanlegir þegar til átakanna kom. Meðstjórnandi í stjórn KA segir að liðið sé ekki með dyraverði og að átökin hafi verið minniháttar.

„Hvar eru saggarnir?"

Ingvi segir að stuðningsmenn Þórs hafi verið í grasstúkunni og Saggarnir, stuðningsmenn KA, í steinstúkunni. „Menn eru að syngja á móti hvor öðrum eins og gengur og gerist á leikjum. Þegar að tíu mínútur voru til leiksloka þá koma tveir stuðningsmenn Þórs, vel ölvaðir og með bjór í hendi, yfir til okkar og setjast við hliðina á mér. Þeir renna niður úlpunum og byrja að öskra: „Hvar eru Saggarnir? Hvar eru Saggarnir?" Þá sauð allt upp úr," segir Ingvi.

Í kjölfarið segir hann að fólk hafi reynt að stía menn í sundur. „Ég fór og ýtti einum og sagði honum að hunskast í burtu. Ég sagði honum að ölvun væri stranglega bönnuð á svæðinu og annað fullorðið fólk var að hjálpa til að stía þeim í sundur og rífa bjórana af þeim. Á endanum voru þeir orðnir vel reiðir og það þurfti að halda mönnum í burtu."

Engin gæsla

Ingvi segir að hann hafi ekki séð einn gæslumann á svæðinu. „Ég á ekki orð yfir því að það hafi ekki verið gæslumenn á þessum nágrannaslag," segir Ingvi en ungir strákar hafi verið að taka við miðum við innganginn. Svo hafi einhverjir strákar verið fyrir aftan mörkin. En enginn hafi verið sjáanlegur upp í stúku eða í kringum stuðningsmennina.

Ingvi segir að enginn högg hafi fengið að fjúka en það hafi verið verulega heitt í mönnum. Mikið af fjölskyldufólki og krökkum hafi verið á vellinum. „Ég á sjálfur eins árs gamlan strák og þakka fyrir að hafa ekki verið með hann með mér á vellinum því þeir settust við hliðina á mér."

Geta ekki staðið í því að stoppa slagsmál

Halldór Aðalsteinsson, meðstjórnandi í stjórn knattspyrnudeildar KA, segir að það sé rétt að til stympinga hafi komið á milli manna. „Það var eitthvað minniháttar, þetta var ekkert alvarlegt." Aðspurður út í það að það hafi verið lítil gæsla á svæðinu segir Halldór:. „Við erum náttúrulega með fullt af gæslumönnum. Ef menn ætla að koma þarna til að slást þá getum við ekki staðið í því. Ég réð mig ekki sem dyravörð, við erum ekki með svoleiðis. Það er bara hefðbundin gæsla eins og annars staðar," segir Halldór.

Hann segir að liðin hafi spilað á móti hvoru öðru í áratugi án þess að eitthvað hafi komið upp á. „Eina sem ég get sagt þér er að það var óskað eftir því að fá lögregluna á þennan leik, ég get sagt þér það, til að vera þarna ef eitthvað kæmi upp á en þeir sáust ekki á vellinum og komu ekki." Hann segist ekki geta sagt til um það hvað það hafi verið margir í gæslunni. „Ég er nú ekki með töluna á því. Við vorum með allan 2. flokkinn sem eru strákar um tvítugt."

„En ég er ekki sammála því að þetta hafi verið einhver átök, smá nudd í þessu. Þetta var óþarfi - en þetta getur skeð á þessum leikjum." segir hann að lokum.

Þess má til gamans geta að Þór vann leikinn 0-2.