Jeppamenn lentu í vandræðum í Eyjafjarðardal

Tveir jeppamenn lentu í vandræðum í Eyjafjarðardal í gærkvöld. Hjálparsveitinni Dalbjörgu barst ósk um aðstoð vegna mannanna á ellefta tímanum í gærkvöld.

Þeir voru á tveimur fjallajeppum og fóru niður dalinn á miðvikudag. Þegar þangað var komið sáu þeir að hann var ófær. Ekki komust þeir heldur til baka upp. Gistu þeir inn í botni dalsins og notuðu svo gærdaginn í að moka sig niður hálfan dalinn um 10 kílómetra leið. Þar náðu þeir símasambandi og gátu beðið um aðstoð.

Níu manns á þremur jeppum frá Dalbjörgu fóru á eftir mönnunum og bílum þeirra en þeir voru eitthvað laskaðir eftir þessa svaðilför, að því er fram kemur á vef Landsbjargar.