Maðurinn sem slasaðist í Járnblendiverksmiðjunni er látinn

Starfsmaður sem varð fyrir sprengingu í einum af þremur ofnum Járnblendiverksmiðjunnar á Grundartanga í gærkvöldi og brenndist mikið, lést undir morgun á gjörgæsludeild Landsspítalans. Vinnueftirlitið og lögregla rannsaka málið og starfssemi verksmiðjunnar liggur niðri.

Maðurinn varð fyrir eldtungu, sem teygði sig úr úr ofninum. Hann var fluttur með þyrlu Landhelgisgæslunnar á gjörgæsludeild Landsspítalans í gærkvöldi.

Slökkviliðið á Akranesi réði niðurlögum elda, sem kviknuðu, og stóð brunavakt í alla nótt. Sérfræðingar í áfallahjálp voru líka kallaðir á vettvang til að sinna starfsfólki, sem var við vinnu þegar slysið varð.

Lögregla og Vinnueftirlitið vinna að rannsókn. Sprenging varð í ofni í verksmiðjunni í apríl, án þess að nokkurn starfsmann sakaði þá.