Styrktu rústabjörgunarsveitina um milljón

Fulltrúar Lionshreyfinginnar á Íslandi afhentu Slysavarnafélaginu Landsbjörg eina milljóna í gær svo að íslenska alþjóðabjörgunarsveitin sem sinnti nýverið björgunarstörfum á Haítí geti keypt tvær rafstöðvar. Slíkar rafstöðvar eru meðal þess búnaðar sem sveitin skyldi eftir á Haítí þegar hún fór þaðan.

„Þessi höfðinglega gjöf kemur úr hjálparsjóði Lions hreyfingarinnar á Íslandi og er þetta sameiginlegt verkefni 93 Lionsklúbba landsins. Þess má geta að Lions hreyfingin á heimsvísu hefur verið afar öflug í stuðningi sínum við hjálparstarf á Haítí," segir í tilkynningu frá Slysavarnafélaginu Landsbjörg.

Við þetta tækifæri sagði Gísli Rafn Ólafsson, einn af stjórnendum íslensku björgunarsveitarinnar, að afar mikilvægt væri að koma sveitinni sem fyrst í útkallshæft form og að stuðningur og velvilji sem þessi skipti þar miklu máli. Einnig ræddi hann um það uppbygginarstarf sem framundan er á Haítí og mun standa yfir næstu árin. Gísli Rafn sagði að alþjóðleg félagasamtök, á borð við Lions hreyfinguna, spiluðu þar stórt hlutverk, ekki síst með því að styðja vel við bakið á sínu félagsfólki á hamfarasvæðinu en á Haítí er starfandi Lions klúbbur með um 80 meðlimum.