Formaður Sjálfstæðisflokksins fundaði með dönskum ráðherra

Formaður Sjálfstæðisflokksins Bjarni Benediktsson átti í dag, 5. febrúar, fund með Lene Espersen, viðskipta- og efnahagsráðherra og aðstoðarforsætisráðherra Danmerkur.

Í tilkynningu frá Sjálfstæðisflokknum segir að á fundinum hafi Bjarni upplýst ráðherrann og formann danska íhaldsflokksins um stöðu efnahagsmála á Íslandi og um hagsmuni þjóðarinnar í Icesave-málinu. „Bjarni lagði mikla áherslu á það við Espersen að mikilvægt væri fyrir Ísland að fá stuðning Dana og ríkisstjórna annars staðar á Norðurlöndunum við áætlun Alþjóðagjaldeyrissjóðsins gagnvart Íslandi, óháð Icesave-deilunni."

Þá segir að Bjarni Benediktsson hafi einnig upplýst Ernu Solberg , formann norska Hægriflokksins, um stöðu þessara mála.