Heilsuverndarstöðin verði Icelandair-hótel

Heilsuverndarstöðin á Barónsstíg verður orðin að hóteli fyrir vorið fallist skipulags­yfirvöld í Reykjavík á áform eiganda byggingarinnar.

Í bréfi til byggingarfulltrúans í Reykjavík frá Haraldi L. Haraldssyni fyrir hönd Álftavatns ehf., eiganda byggingarinnar á Barónsstíg 47, segir að rætt hafi verið að undanförnu við Icelandair Hotels um leigu á húsinu undir hótelrekstur sem myndi hefjast strax í vor. „Til þess að það geti orðið að veruleika þarf að vinna hratt í málinu,“ segir Haraldur í bréfinu sem byggingarfulltrúi fyrir sitt leyti vísaði til skipulagsráðs.

„Hefja þarf markaðssetningu hótelsins vegna sumarsins 2010 ekki seinna en í byrjun febrúar næstkomandi. Takist það ekki má gera ráð fyrir að hugmynd þessi nái ekki fram að ganga því næsta „season“ er þá ekki fyrr en sumarið 2011 og glatast þá niður eins og hálfs árs arðsemi húss og hótelrekstrar,“ segir í erindi Álftavatns ehf.

Fram kemur í bréfinu að eftir mikla vinnu á undanförnum misserum sé Barónsstígur 47 nú tilbúinn í rekstur sem læknamiðstöð og sjúkrahótel. Ekki hafi fundist aðilar í þann rekstur. Hins vegar henti hótelrekstur jafnvel enn betur en læknamiðstöð í því umhverfi sem húsið sé því mun færri bílastæði þurfi fyrir hótel.

„Einnig skal tekið fram að Icelandair Hotels er ein virtasta hótelkeðja á Íslandi og því má gera ráð fyrir að rekstur hennar á hóteli á þessu svæði muni vera vandaður og ætti ekki að falla gegn íbúum í næsta nágrenni,“ segir í bréfi Álftavatns, sem einmitt hefur mótmælt stækkunar­áformum við Domus Medica á þeim grundvelli að stækkunin myndi skapa mikinn bílastæðavanda á svæðinu.

Þá segir Haraldur að fjármagn sé þegar tryggt. Vinna við breytingar á húsinu muni skapa að minnsta kosti 25 störf fram á vor. „Auk þess mun það skapa ný störf til framtíðar sem hlýtur að skipta miklu máli í því ástandi sem okkar þjóðarbú er nú í,“ segir í erindi Haraldar sem lagt var fyrir skipulagsráð á miðvikudag. Þar var afgreiðslu málsins frestað. - gar