Ekki kosið um stækkun álvers samhliða þjóðaratkvæðagreiðslu

Atkvæðagreiðsla um nýtt deiliskipulag sem felur í sér stækkun álversins í Straumsvík, fer ekki fram samhliða þjóðaratkvæðagreiðslunni um Icesave. Alcan greiddi á sínum tíma fyrir gerð deiliskipulags, sem bæjarstjórinn í Hafnarfirði segir lúta öðrum reglum er kostun á gerð aðalskipulags.

Kosning um deiliskipulag vegna mögulegrar stækkunar álversins í Straumsvík, fer ekki fram samhliða þjóðaratkvæðagreiðslunni um Icesave hinn 6. mars. Lúðvík Geirsson bæjarstjóri í Hafnarfirði segir að ekki hafi reynst vilji til að hafa atvkæðagreiðslurnar á sama tíma og þá sé tíminn fram til 6. mars einfaldlega of knappur.

Bæjarráð Hafnarfjarðar fór yfir svar Alcans við erindi bæjarstjórnar vegna málsins á fundi bæjarráðs í gær. Lúðvík segir að ljúka þurfi ýmis konar pappírsvinnu varðandi deiliskipulagið áður en lengra verði haldið. Einhverjar breytingar kunni að verða gerðar frá því deiliskipulagi sem bæjarbúar greiddu atkvæði um 31. mars 2007.

Þá var deiliskipulaginu og um leið stækkun álversins hafnað með naumum meirihluta atkvæða eða 50,3 prósentum en 49,3 prósent vildu að stækkunin yrði samþykkt. Aðeins munaði 88 atkvæðum á að deiliskipulagið yrði samþykkt.

Lúðvík segist ekki geta spáð fyrir um hvenær atkvæðagreiðslan geti farið fram. Það verði einhvern tíma eftir 6. mars. En í október í fyrra höfðu stuðningsmenn stækkunar álversins safnað nægilega mörgum undirskriftum til að knýja fram nýja atkvæðagreiðslu.

Alcan greiddi fyrir gerð deiliskipulagsins á sínum tíma. Það er heimilt samkvæmt lögum, en öðru máli gegnir um aðalskipulag, eins og fram kom í úrskurði umhverfisráðherra á dögunum, þegar ráðherra hafnaði aðalskipulagi hreppa sem liggja að Þjórsá og gerðu ráð fyrir byggingu virkjunar í neðri hluta árinnar.