Halli í Andra býður sig fram í prófkjöri

Prófkjör Sjálfstæðisflokksins í Mosfellsbæ fer fram á morgun, laugardag. Haraldur Sverrisson bæjarstjóri sækist einn eftir fyrsta sætinu en fimm manns sækjast eftir öðru sæti; Bryndís Haralds, Eva Magnúsdóttir, Hafsteinn Pálsson, Herdís Sigurjónsdóttir og Örn Jónasson.

Athygli vekur að meðal fimmtán frambjóðenda er hinn góðkunni athafnamaður og hestamaður Haraldur Haraldsson í Andra en hann býður sig fram í fjórða sæti. Haraldur er jafnframt aldursforsetinn í frambjóðendahópnum, 65 ára.

Spurður hversvegna hann ákvað að fara í framboð svarar Haraldur að hann vilji leggja sitt af mörkum fyrir þá sem vildu njóta lífsins í Mosfellsbæ þegar árin færðust yfir og væru í fullu fjöri. Hann vilji reyna að koma í veg fyrir að samskonar ástand skapist í Mosfellsbæ og varð til þess að hann hrökklaðist úr Árbæ og Selási eftir þrjátíu ára búsetu, - það vantaði húsnæði sem hentaði fólki 60 ára og eldra.

Haraldur, sem jafnan er kenndur við fyrirtæki sitt, Andra, hefur víða markað spor í atvinnulífinu. Hann var einn af frumkvöðlum krítarkortavæðingar landsins með stofnun Kredidkorta hf. fyrir 30 árum, var í eigendahópi Stöðvar 2 á frumbýlisárunum, stóð að úthafsútgerð í Kyrrahafi og var stjórnarformaður og aðaleigandi Áburðarverksmiðjunnar í Gufunesi.