Steingrímur Hermannsson jarðsunginn á þriðjudag

Útför Steingríms Hermannssonar, fyrrverandi forsætisráðherra, fer fram á vegum ríkisins næstkomandi þriðjudag 9. febrúar klukkan tvö frá Dómkirkjunni í Reykjavík.

Steingrímur lést á heimili sínu í Garðabæ síðastliðinn mánudag á 82. aldursári. Hann var formaður Framsóknarflokksins á árunum 1979 til 1994. Steingrímur varð dóms- og kirkjumála- og landbúnaðarráðherra árið 1978 og gegndi ýmsum ráðherraembættum þar til hann varð forsætisráðherra 1983. Hann varð aftur forsætisráðherra árið 1988 fram til 1991.

Steingrímur lauk opinberum ferli sínum sem bankastjóri við Seðlabanka Íslands en hann var fyrst ráðinn í þá stöðu 1994 og gegndi henni til 1998.

Líkt og fram kom í gær liggur frammi minningarbók á skrifstofu Framsóknarflokksins þar sem þeir sem vilja heiðra minningu Steingríms geta ritað nafn sitt. Hægt er að koma við á skrifstofunni í dag og á mánudag milli klukkan eitt og fimm.