Annar sigur AZ í röð

Hollenska liðið AZ Alkmaar virðist hafa rétt úr kútnum eftir erfiða byrjun í hollensku úrvalsdeildinni en Íslendingar voru víða í eldlínunni í evrópsku knattspyrnunni í gær.

AZ vann 1-0 sigur á Utrecht en þetta var annar sigur liðsins í röð. AZ hafði fyrir þessa tvo leiki ekki unnið í fyrstu fimm umferðum deildarinnar í haust.

Jóhann Berg Guðmundsson og Kolbeinn Sigþórsson voru báðir í byrjunarliði AZ í gær. Kolbeinn lék allan leikinn en Jóhann var tekinn af velli í blálok leiksins.

Báðir léku þeir í þriggja manna sóknarlínu, Jóhann Berg hægra megin og Kolbeinn vinstra megin.

AZ kom sér upp í níunda sæti deildarinnar með sigrinum en er átta stigum á eftir toppliði Ajax sem er enn taplaust eftir sjö umferðir.

Í Skotlandi spilaði Eggert Gunnþór Jónsson allan leikinn sem miðvörður er lið hans, Hearts, tapaði fyrir Motherwell á heimavelli, 2-0.

Motherwell komst þar með upp í þriðja sæti deildarinnar á kostnað Hearts sem er í fjórða sæti.

Celtic og Rangers eru enn með fullt hús stiga á toppi deildarinnar, Celtic eftir sex leiki og Rangers eftir fimm.

FC Kaupmannahöfn, lið Sölva Geirs Ottsen, er taplaust á toppi dönsku úrvalsdeildarinnar en liðið vann 3-0 sigur á Midtjylland á útivelli í gær. Sölvi Geir er þó frá vegna meiðsla.

SönderjyskE vann góðan sigur á Álaborg á útivelli, 2-0. Ólafur Ingi Skúlason lék allan leikinn á miðju liðsins í gær en Arnar Darri Pétursson, markvörður, var á bekknum.

SönderjyskE er nú í fimmta sæti deildarinnar með þrettán stig eftir tíu leiki. FCK er langefst á toppnum með 26 stig.