Gjaldeyristekjurnar dafna í Dýrafirði

Þrjúhundruð þúsund regnbogasilungar vaxa nú upp í sjókvíum á Dýrafirði, sem vonast er til að breytist í sex til sjöhundruð milljóna króna útflutningsverðmæti og skapi tíu störf á Þingeyri.

Við siglum úr höfninni á Þingeyri í haustblíðunni en svona segja Dýrfirðingar að veðrið sé búið að vera síðustu fjóra mánuði. Hnísur leika listir sínar á firðinum en leið okkar liggur að sex sjókvíum á Haukadalsbót, á vegum fyrirtækisins Dýrfisks, sem lögmennirnir Sigurður G. Guðjónsson og Björgvin Þorsteinsson standa að.

Silungurinn fær fóðrið í gegnum öfluga vatnsbyssu en fiskeldið hófst fyrir tveimur árum. Þrjúhundruð þúsund fiskar eru að vaxa upp, sem í sláturstærð verða milli 600 og 1.000 tonn. Hátt verð fæst fyrir stóran regnbogasilung um þessar mundir, um 800 krónur fyrir kílóið, og vonast Sigurður G. Guðjónsson til að milli sex og sjöhundruð milljónir króna fáist fyrir þann fisk sem nú er í kvíunum.

Brynjar Gunnarsson, starfsmaður Dýrfisks, segir að 40 tonnum hafi verið slátrað í fyrrahaust sem fyrstu prufu og það hefði gengið mjög vel. Hann segir aðstæður í Dýrafirði henta vel. Fiskurinn vaxi vel, enda skilyrðin góð. Sjávarhiti í firðinum sé ennþá 10-11 gráður, og það sé mjög gott.

Fyrir samfélagið fyrir vestan munar um störfin. Þrír menn starfa þegar við fóðrun og seiðaeldi, sem fram fer á Tálknafirði, og framundan er að bæta við sex til sjö störfum í vinnslu á Þingeyri.