Neteftirlit Vinnumálastofnunar skapar alvarlegt fordæmi

Hæstaréttarlögmaður segir að úrskurður Persónuverndar um neteftirlit Vinnumálastofnunar hjá atvinnulausum skapi alvarlegt fordæmi og að gagnrýni í úrskurðinum á Vinnumálastofnun sé veikburða. Stjórn Persónuverndar breytti úrskurði stofnunarinnar.

Til þess að geta þegið atvinnuleysisbætur þurfa umsækjendur um bætur að teljast vera í virkri atvinnuleit í skilningi laga um atvinnuleysistryggingar. Ákvæði laganna hafa verið túlkuð á þann veg að þeim sem þiggja bætur sé ekki heimilt að dveljast erlendis hvort sem um styttra frí eða lengri dvöl er að ræða.

Kona sem þáði bætur heimsótti venslafólk sitt í Svíþjóð og skráði sig inn á vef Vinnumálastofnunar þaðan, en það þurfa þeir sem þiggja bætur að gera reglulega. Henni var í kjölfarið synjað um bætur, þar sem hún var erlendis og uppfyllti ekki skilyrði um virka atvinnuleit. Vinnumálastofnun hafði komist að því að hún væri stödd erlendis með því að skoða ip-tölu tölvunnar sem konan skráð sig í gegnum.

Konan kærði þetta til Persónuverndar sem komst að þeirri niðurstöðu í úrskurði sínum að þetta hefði Vinnumálastofnun verið heimilt. Í úrskurði sínum segir Persónuvernd að hún geri ekki athugasemd við eftirlit Vinnumálastofnunar en stofnunin telur rétt að Vinnumálastofnun láti þá sem þiggja bætur vita af eftirlitinu.

Samkvæmt heimildum fréttastofu var úrskurðinum breytt af stjórn Persónuverndar áður en hann var birtur, en í upphaflegum úrskurði kom fram mjög hörð gagnrýni á vinnubrögð Vinnumálastofnunar.

Hæstaréttarlögmaður sem fréttastofa ræddi við segir að veikburða gagnrýni á vinnubrögð Vinnumálastofnunnar í úrskurðinum skapi alvarlegt fordæmi. Hann segir að þetta opni fyrir að ríkisstofnanir leyfi sér að láta vita af eftirlitinu eftir á. Hann segir það einnig gamaldags viðhorf að virk atvinnuleit geti ekki farið fram erlendis, enda fari flest öll atvinnuleit fram á netinu í dag.