Tunglfiskur veiddist við Íslandsstrendur

Sjómenn á Kap VE  veiddu Tunglfisk er þeir voru á Makrílveiðum um það bil 60 mílur út af Reykjanesi á dögunum. Frekar sjaldgæft er að tegundin veiðist hér við land en þeir lifa nánast einungis í hlýjum sjó.

„Þetta er frekar sjaldgæft að sjá þennan fisk við Íslandsstrendur, það er alls ekki mikið um þetta," segir Georg Skæringsson, verk- og tæknistjóri hjá Þekkingarsetri Vestmannaeyja. Hann er nú kominn með fiskinn í sínar hendur og ætlar að stoppa hann upp. „Við erum búnir að koma honum í frost og ganga frá honum, nú þarf bara að finna tíma og flutning fyrir hann."

Georg segist vera með einn slíkan fisk hjá sér nú þegar en hann er töluvert minni. „Þessi fiskur sem strákarnir á Ísleifi VE veiddu er meter á lengd og tæplega meter á breidd. Hann er helvíti stór," segir Georg en segir erfitt að segja nákvæmlega til um það hversu þungur fiskurinn er. „Ég myndi giska á svona hundrað til tvö hundrað kíló."