Allt í mínus hjá Mínus

„Þetta er svakalegt! Það brennur allt til grunna sem maður kemur við! En við áttum síðasta tóninn þarna," segir Krummi í Mínus. Hljómsveitin hélt síðustu tónleikana í Batteríinu á föstudagskvöldið. Tónleikastaðurinn brann sem kunnugt er í gærmorgun. Mínus-menn skildu bassa- og gítarmagnara eftir í kjallaranum og hluta af trommusettinu því morguninn eftir tónleikana flaug bandið til Kaupmannahafnar og spilaði þar á laugardagskvöldið.

„Við hefðum eflaust verið löngu komnir heim og búnir að taka græjurnar ef við hefðum ekki verið fastir í Danmörku út af þessum bölvuðu flugvirkjum og þessu eldgosi!" segir Krummi, allt annað en ánægður. Þegar það náðist í hann síðdegis í gær var hann ekki búinn að skoða verksummerkin og vissi hreinlega ekki hversu illa græjurnar voru farnar.

„Þetta var allt í hefí dútí flight-keisum, svo þetta gæti hafa sloppið," segir hann. „Þarna var magnari sem Bjarni gítarleikari er búinn að eiga í 17 ár, alvöru Marshall JCM græja, svo það væri mjög slæmt ef hann væri farinn. Það munaði litlu að ég ætlaði að geyma mitt dót þarna, en sem betur fer fór ég með það heim áður en við flugum út." Auk dótsins hjá Mínus var magnari í eigu Gregs Barrett í DLX ATX fyrir barðinu á vatni og sóti.

Bruninn er slæmur fyrir bransann því það er ekki eins og það sé allt vaðandi í heppilegum búllum til að spila á. Grand Rokk var til að mynda lokað nýlega.

En það er ljós við enda ganganna hjá Krumma og félaga. „Sem betur fer hefur gengið frábærlega hjá okkur að semja nýju plötuna og við byrjum að taka hana upp í lok apríl," segir hann.- drg