Gjörningaveður á Suðurlandi

Mikið þrumuveður gerði á sunnanverðu landinu síðdegis í gær og var mörgum brugðið þegar eldingar lýstu reglulega upp himininn allt frá Eyrarbakka áleiðis í Borgarfjörð.

„Þetta er sjaldgæft og enn sjaldgæfara að þetta blasi svona við úr borginni,“ segir Teitur Arason veðurfræðingur á Veðurstofu Íslands.

Hann segir eldingar oft myndast í skúraveðri á eftir kuldaskilum. Í fyrrinótt hafi kuldaskil einmitt farið yfir landið, og að þeim hafi fylgt kaldara loft og óstöðugt, sem myndaði skúrahríðir og þrumuveður.

Teitur segir að ekki liggi fyrir strax um hversu margar eldingar hafi verið að ræða. Hann hafði hins vegar sjálfur séð minnst fimm þegar út um glugga Veðurstofunnar er Fréttablaðið ræddi við hann fyrir kvöldmat. Þrumuveðrið var á leið í norður og ekki talið útilokað að það myndi ná alla leið upp í Borgarfjörð.

Í dag er gert ráð fyrir stormi á landinu og sterkum vindhviðum sem geta orðið allt að 40 metrar á sekúndu á verstu stöðum, til dæmis undir Hafnarfjalli. Búist er við að veðrið skelli á sunnanverðu landinu síðdegis og standi langt fram á kvöld. Mikil væta mun fylgja vindinum.

- sh