Frambjóðandi býður ókeypis í strætó

Dofri Hermannsson varaborgarfulltrúi ætlar að bjóða fólki ókeypis í strætó, leið 6, sem fer frá Hlemmi klukkan sjö mínútur yfir eitt á laugardaginn. Tilgangurinn er sá að kynna fólki hugmyndir sínar um tilraunaverkefnið Frístundastrætó í Grafarvogi.

Dofri segir á Facebook síðu sinni að foreldrar í Reykjavík skutli börnum sínum fyrir 170 milljónir á mánuði. Það þurfi að minnka skutlið.

„Skutlið er slæmt af því að tekur mikinn tíma og kostar mikla peninga. Það veldur því að það sitja ekki öll börn við sama borð í frístundum vegna þess að mörg eiga ekki einkabílstjóra fyrir mömmu og pabba eða afa og ömmu," segir Dofri í samtali við Vísi.

Dofri vill byrja með verkefnið Frístundastrætó í Grafarvogi því þar þekki hann best til. Hann vill svo laga kerfið að öðrum hverfum borgarinnar ef það gengur vel í Grafarvogi.

Dofri er á meðal frambjóðenda í prófkjöri Samfylkingarinnar sem fram fer aðra helgi.