Jóhanna: Þjóðin líti til íslenska landsliðsins

Jóhanna Sigurðardóttir, forsætisráðherra, telur að þjóðin þyrfti að líta til landsliðsins í handbolta um fyrirmyndir í vörn og sókn í atvinnu- og efnahagsmálum á næstu árum. Þetta kom fram í ávarpi sem hún flutti á Selfossi í tengslum við verkefnið 20/20 Sóknaráætlun sem ætlað er að draga fram styrkleika og sóknarfæri landsmanna og gera tillögur og áætlanir á grunni þeirra. Markmiðið með áætluninni er að tryggja að Ísland verið eitt af 10 samkeppnishæfustu löndum heims árið 2020.

„Stundum er því haldið fram að þegar staðið er í varnarbaráttu eins og þeirri sem Íslendingar heyja nú vegna skuldavanda ríkissjóðs og yfirstandandi efnahagserfiðleika, sé ekki rétti tíminn til þess að breyta eða sækja fram," sagði Jóhanna og tók dæmi af íslenska landsliðinu til þess að sýna fram á að þetta sjónarmið fengi ekki staðist. Hún sagði leikmenn liðsins hafa glöggan

skilning á því að rétt hugarfar, vilji til þess að sigra og raunhæft mat á stöðunni, þurfi að vera fyrir hendi til að ná árangri.

Aldrei nóg að pakka í vörn

„Standi þeir vörnina vel skapast oft góð skilyrði fyrir skyndisóknir. Stundum er þó betra að fara sér hægar í sóknina og byggja hana vel upp í stað þess að skjóta á markið í bráðræði úr þröngum færum. Þeir sýna okkur betur en margt annað að sókn getur verið góð taktík sem varnarleikur. Það er aldrei nóg að pakka bara í vörn. Í stórum dráttum eru það sömu viðhorf, sami skilningur og samskonar mat sem þarf að liggja til grundvallar þegar við sem þjóð metum stöðu okkar til þess að verjast og sækja fram við erfiðar aðstæður," sagði Jóhanna.