Ætla að útskýra málstað Íslendinga

Íslenskir þingmenn búa sig nú undir að upplýsa erlenda starfsbræður um stöðu Íslands í framhaldi af ákvörðun forsetans um að synja Icesave-lögunum staðfestingar.

Í vikunni verða haldnir tveir alþjóðlegir fundir sem íslenskir þingmenn sækja. Evrópuráðið þingar í Strassborg 25. til 29. janúar og fundur Norðurlandaráðs verður í Danmörku dagana 26. og 27. janúar.

Þrír alþingismenn sitja Evrópuráðsfundinn en hann geta sótt 318 fulltrúar og jafnmargir varamenn frá aðildarríkjunum 47.

Nokkrir tugir þingmanna taka þátt í fundum Norðurlandaráðs.

Samkvæmt upplýsingum Fréttablaðsins verða þessar tvær fjölmennu samkomur nýttar til að útskýra málstað Íslendinga. Verður það gert á sérstökum smærri fundum og í einkasamtölum. - bþs