Nágranni kærir og eigandi vill bætur

Eigendur lóðarinnar Miðskóga 8 krefja bæjaryfirvöld á Álftanesi um 13,2 milljónir króna í „uppsafnaðan kostnað“ vegna „ólöglegrar meðferðar“ á umsókn þeirra um byggingarleyfi fyrir einbýlishúsi allt frá árinu 2005 þar til í haust að leyfið var veitt.

Nágranni lóðareigendanna, íbúi í Miðskógum 6, hefur hins vegar fyrir sitt leyti kært byggingarleyfið til úrskurðarnefndar skipulags- og byggingarmála. „Í undirbúningi er að óska eftir því við umboðsmann Alþingis að hann skoði málið,“ segir meðal annars í kæru Kristjáns Sveinbjörnssonar til úrskurðarnefndarinnar. Eins og fram hefur komið er Kristján bæjarfulltrúi á Álftanesi og fyrrverandi forseti bæjarstjórnar.

Eigendur Miðskóga 8 sundurliða áðurnefnda 13,2 milljóna króna kröfu í þóknun til lögmanna, hönnunarkostnað, sérfræðikostnað og fjármagnskostnað. Segjast þeir reiðubúnir til að ræða kröfu sína „í samhengi“ við 7,8 milljóna króna kröfu sveitarfélagsins á hendur þeim vegna gatnagerðar- og byggingargjalda.

Þess má síðan geta að tveir eigenda Miðskóga 8, hjónin Hlédís Sveinsdóttir og Gunnar Árnason, reka nú meiðyrðamál á hendur Kristjáni Sveinbjörnssyni og sveitarfélaginu Álftanesi fyrir óhróður sem birtur var á heimasíðu sveitarfélagsins árið 2008. - gar