Íslenska sveitin lendir skömmu eftir miðnætti

Áætlað er að íslenska rústabjörgunarsveitin lendi á Keflavíkurflugvelli um klukkan 00:30 í nótt en það er nokkuð seinna en áætlað var. Fyrri áætlanir gerðu ráð fyrir að sveitin kæmi til landsins seinnipartinn í dag og síðar var ráðgert að hún myndi lenda í Keflavík í kvöld.

Björgunarsveitarmennirnir dvöldu í rúma viku á jarðskjálftasvæðinu á Haítí. Sveitin flaug í gær með vél frá Iceland Express yfir til Nassau á Bahama eyjum en þar var gist í nótt. Síðar í dag verður flogið til Íslands með viðkomu í Halifax í Kanada og eldsneyti tekið fyrir loka áfangann heim.